काठमाडौं ।
राष्ट्रपति गोटाबाया राजापाक्ष उनको सरकारी आवासबाट भागेपछि श्रीलंकामा सर्वदलीय बैठक बसेको छ ।
सभामुखको आवासमा आयोजित बैठकमा प्रधानमन्त्री विक्रमासिंघेलगायत केही नेता भने जुममार्फत जोडिएका थिए ।
प्रधानमन्त्री रनिल विक्रमासिघेंको आह्वानमा बसेको सर्वदलीय बैठकमा राष्ट्रपति र प्रधानमन्त्री दुवैको राजीनामा मागिएको छ ।
राष्ट्रपतिको सरकारी आवासमा आज प्रदर्शनकारी प्रवेश गरेपछि गोटाबाया सुरक्षित स्थानतर्फ भागेका छन् । तर उनी कहाँ छन् भन्ने हालसम्म खुलाइएको छैन ।
श्रीलङ्काका सभामुख महिन्दा यापा एवेयवारदेनाको अध्यक्षतामा बसेको सर्वदलीय बैठकमा राष्ट्रपति र प्रधानमन्त्रीले राजीनामा दिएर सभामुखलाई अन्तरिम राष्ट्रपति बनाउनुपर्ने सुझाव दिइएको थियो ।
सुझावप्रति प्रधानमन्त्री विक्रामासिंघे सकारात्मक नबनेका बैठकमा सहभागी श्रीलङ्का मुस्लिम कंग्रेसका सांसद रोफ हाकिमको भनाइ छ ।
प्रधानमन्त्री विक्रामासिघेंले राजीनामा दिन अस्वीकार गरेपछि बैठकमा कुनै सहमति नबनेको हाकिमले बताए ।
तथापि सभामुखले राष्ट्रपति र प्रधानमन्त्री दुवैलाई लिखित रूपमा राजीनामा माग्ने निर्णय गरेको र सबै जसो दलका नेताले यसप्रति सहमति जनाएको पनि हाकिमले खुलाएका छन् ।
बैठकमा सर्वदलीय सरकार बनाएर अहिलेको सङ्कटबाट सबै मिलेर बाहिरिनुपर्ने सुझाव पनि राखिएको पनि बताइएको छ ।
