काठमाडौं ।
नेपाली कांग्रेसले दुई वटा भ्रातृ संस्था र नौ वटा शुभेच्छुक संस्था थप गर्ने भएको छ ।
अब कांग्रेसका भ्रातृ संस्थाको संख्या १३ बाट बढेर १५ पुग्नेछ छ भने शुभेच्छुक संस्थाको संख्या २७ पुग्नेछ ।
आइतबार बसेको पदाधिकारी बैठकले दुई भ्रातृ र नौ वटा शुभेच्छुक संस्थाहरुलाई मान्यता दिने गरी प्रस्ताव तयार गरेको हो ।
भ्रातृ संस्थाकोरुपमा नेपाल थारू संघ र नेपाल आदिवासी जनजाती महासंघले मान्यता पाउने भएका बैठकमा सहभागी एक नेताले बताए ।
त्यस्तै, नेपाल लोकतान्त्रिक खेलकुद संघ, नेपाल लोकतान्त्रिक निर्माण व्यवसायी संघ, नेपाल लोकतान्त्रिक राष्ट्रिय यातायात व्यवसायी संघ, नेपाल लोकतान्त्रिक उद्योग व्यापार व्यवसायी संघ, नेपाल लोकतान्त्रिक पर्यटन व्यवसायी संघलाई शुभेच्छुक संस्थाकोरुपमा मान्यता दिने तयारी भएको छ ।
यस्तै नेपाल लोकतान्त्रिक संस्थागत तथा निजी विद्यालय शिक्षक संघ, नेपाल लोकतान्त्रिक आयुर्वेद तथा प्राकृतिक चिकित्सक संघ, नेपाल लोकतान्त्रिक साना होटल व्यवसायी संघ र नेपाल लोकतान्त्रिक भाषा साहित्यि लेखक संघलाई शुभेच्छुक संस्थाकोरुपमा मान्यता दिने तयारी भएको कांग्रेसका एक नेताले बताए ।
पदाधिकारीले पास गरेको यो प्रस्ताव सोमबारदेखि बस्ने बैठकमा प्रस्तुत गरिनेछ । बैठकले भ्रातृ तथा शुभेच्छुक संस्थाहरुको विधान स्वीकृत गरी ती संस्थाहरुलाई भ्रातृ तथा शुभेच्छुक संस्थाकोरुपमा अनुमति प्रदान गर्नेछ ।
१४ औँ महाधिवेशन अगाडि नै मान्यता पाउन आवेदन दिएका यी भ्रातृ तथा शुभेच्छुक संस्थालाई सभापति शेरबहादुर देउवाले महाधिवेशन अघि मान्यता दिन सकेका थिएनन् ।
पार्टीको महाधिवेशनमा भ्रातृ तथा शुभेच्छुक संस्थाहरुबाट महाधिवेशन प्रतिनिधि सहभागी हुन पाउने व्यवस्थाका कारण कांग्रेसमा यस्ता संस्था थप्न नेताहरु लालायित हुने गरेका छन् ।
