काठमाडौं ।
सत्ता गठबन्धनको मंगलबारको बैठक पनि निष्कर्षविहीन भएको छ ।
सिट बाँडफाँटका लागि मापदण्डमै सहमति नभएपछि उनीहरुबीचको बैठक बिनानिष्कर्ष सकिएको हो ।
बुधवार पुनः छलफल गरेर भदौ ९ गतेसम्म टुंगो लगाइने कार्यदलका सदस्य तथा राष्ट्रिय जनमोर्चाका सचिव हिमलाल पुरीले जानकारी दिए ।
प्रधानमन्त्री निवास बालुवाटारमा भएको बैठकमा कार्यदलका संयोजक कृष्ण सिटौला उपस्थित हुन नसकेका कारण बैठक बुधवारका लागि सारिएको उनले बताए ।
गठबन्धनबीच स्थानीय तहको चुनावका साथै २०७४ सालको समानुपातिक मतलाई समेत सिट बाँडफाँटको मुख्य आधार बनाइएको उनले बताए ।
मापदण्डमात्र भनेर नहुने भन्दै उनले चुनाव जित्नेगरी गठबन्धन गरिने उनको भनाइ छ । उनले बुधवार साँझ ५ बजे बस्ने बैठकले निष्कर्ष निकाल्ने र ढिलोमा ९ गते विहीवारभित्र टुंगो लाग्ने बताए ।
