आइतबार बिहान खोटाङको मात्तिमबिर्ता केन्द्रबिन्दु भएर गएको भूकम्पबाट भोजपुरमा २ घरमा क्षति भएको छ।
भोजपुर नगरपालिका–१२ टक्सारमा २ घर क्षतिग्रस्त भएको हो।
त्यस्तै, खोटाङको साकेला गाउँपालिकामा पनि एउटा कच्ची घर भत्किएको छ। खोटाङका सहायक प्रमुख जिल्ला अधिकारी पवित्रप्रकाश शाहका अनुसार घर भत्किए पनि मानवीय क्षति भएको छैन।
भूकम्प गएको खोटाङसहित पूर्वी पहाडी जिल्लाका नागरिक घरभित्र जान डराएका छन् । पटक–पटक परकम्पसमेत गइरहेकाले नागरिक घरभित्र जान डराएका हुन्।
ठूलो पानी परिरहेकाले घर बाहिर बस्न पनि समस्या भएको छ । भूकम्पको केन्द्रविन्दु साकेला गाउँपालिका वडा नम्बर ४ मा २० वटाभन्दा धेरै घर चर्किएको र निरन्तर परकम्प गइरहेकाले त्यहाँका स्थानीय त्रास र जोखिममा छन् ।
जिल्ला प्रशासन कार्यालय, नेपाल रेडक्रस सोसाइटी, पालिका र वडाको समन्वयमा अहिले सुरक्षाकर्मी पनि प्रभावित ठाउँमा पुगेको छ । भूकम्पका कारण यातायात, सञ्चार, विद्युत् आपूर्तिमा कुनै समस्या भएको छैन ।
भूकम्प प्रभावित क्षेत्र दुर्गममा पर्छ । भूकम्पको केन्द्रविन्दु मात्तिमबिर्तामा ढुङ्गा र माटोले बनेका दुईदेखि तीन तले कच्ची घरहरू रहेकाले र लगातार परकम्प गइरहेकाले थप जोखिम भने बढाएको छ ।
राष्ट्रिय भूकम्प मापन तथा अनुसन्धान केन्द्रका वरिष्ठ भूकम्पविद् लोकविजय अधिकारीका अनुसार आइतबार बिहान ८ बजेर १३ मिनेट जाँदा मात्तिमबिर्ता केन्द्रबिन्दु भएर ६ रेक्टर स्केलको भूकम्प गएको हो।
