काठमाडौं ।
नेपाल राष्ट्र बैंकका गभर्नर महाप्रसाद अधिकारी नेकपा एमालेको अर्थ तथा योजना विभागको सदस्य रहेको कुरो बाहिर आएपछि विराटनगरमा रहेका एक जना चार्टर्ड एकाउण्टेण्ट एकाएक चर्चामा आएका छन् । एम. अधिकारी भनिएका व्यक्ति गभर्नर महाप्रसाद नभएर अरु नै भएको एमालेले बताउँदै आएको छ ।
अहिले सोही प्रकरणमा विराटनगरका चार्टर्ड एकाउण्टेण्ट मनोज अधिकारी चर्चामा आएका छन् । एकाएक एम. अधिकारीमा नाम जोडिएपछि उनी केही दिन मोबाइल बन्द गरेर ‘बेपत्ता’ नै भएका थिए । मोरङको बूढीगंगा गाउँपालिका निवासी मनोजले आफू एमालेको केन्द्रीय अर्थ तथा योजना विभागको सदस्य नभएको र पार्टीमा आस्था राख्ने साधारण सदस्य र पेशाकर्मी मात्र भएको बताएका छन् ।
उनीसँग सोधिएको केही जिज्ञासामा अधिकारीले आफू र आफ्नो पेशाबारे यसरी प्रष्टिकरण दिएका छन् :
तपाईं एम. अधिकारीका नाममा एकाएक चर्चामा आउनुभयो,के तपाईं नै एमाले अर्थ तथा योजना विभागको सदस्य भनिएका एम. अधिकारी हो ?
-हैन । म विराटनगर निवासी चार्टर्ड एकाउन्टेन्ट मनोज अधिकारी हँु । म चार्टड एकाउन्टेन्ट संघ (एक्यान) को प्रदेश १ को अध्यक्ष हुँ । हाल मोरङको बूढीगंगा गाउँपालिका १ मा सपरिवार बस्छु । मेरो मूल पेशा लेखापरीक्षण हो । म एमाले पार्टीको अर्थ तथा योजना समितिको सदस्य होइन ।
नाम चर्चामा आएपछि एकाएक मोबाइल नै बन्द गरेर किन ‘बेपत्ता’ हुनुभएको ?
-होइन म ‘हाइड’ भएको छैन । आर्थिक वर्षको अन्तिम समयमा कामको चाप धेरै हुन्छ । यसैले कामका लागि हरेक वर्ष झैँ यसपालि पनि मोबाइल बन्द गरेर काममा मग्न भएर लागेको हुँ ।
तर तपाईं त पार्टीको दबाबले तनावमा परेर ‘हाइड’ हुनुभएको भन्ने समाचार पनि आएको थियो नि ?
-मैले पछि थाहा पाएँ । तर मलाई कसैले दबाब र तनाव दिएको छैन । मेरा सम्बन्धमा आएका समाचारबारे मैले सामाजिक सञ्जालमा प्रष्टसँग भनिसकेको छु ।
के प्रष्टिकरण दिनुभएको छ ?
-म कुनै पार्टीको विज्ञ होइन । मेरो पुख्र्यौली घर धनकुटाको मूर्तिढुंगा हो । २०७० देखि विराटनगरमा बसेर पेशा धानिरहेको छु । पहिले कलेज पनि पढाउँथे । अहिले पढाउँदिन । सबै समय आफनो पेशामै खर्चिएको छु । म एमालेको अर्थ तथा योजना समितिको सदस्य होइन भनेर भनेको छु ।
तपाईंले एमालेको सदस्यता लिनुभएको छ कि छैन ? अहिले कुन पदमा हुनुहुन्छ ?
-मैले एमालेको सदस्यता लिएको धेरै पहिले हो । तर आफू पेशाकर्मी भएकाले सक्रिय रुपले राजनीतिमा कहिल्यै देखा परेको छैन । हाल जिल्ला तहको पेशाकर्मी संगठनमा आबद्ध छु ।
पार्टीले अर्थ तथा योजना विभागको सदस्य तपाईं नै हो भनेर भन्यो भने नि ?
-म हालसम्म पार्टीको विज्ञको हैसियतमा छैन । मलाई कसैले तपाईंलाई अर्थ तथा योजना विभागको केन्द्रीय तहमा नियुक्त गर्दैछन् भन्ने मौखिक जानकारीसम्म दिएका थिए । तर मैले कुनै आधिकारिकता प्राप्त गरेको छैन ।
गर्भनर महाप्रसाद अधिकारीसँग मेरो नाम मिल्दोजुल्दो भए पनि उक्त समितिमा म नै नियुक्त भएको हो भन्ने कुनै यकिन छैन । अब पार्टीले एम. अधिकारी भनेको मै हो भनेर भने पनि हालको विषम परिस्थितिमा आफ्नो पेशा र पारिवारिक अवस्थाले गर्दा म उक्त पदमा बस्न असमर्थ छु ।
पार्टीबाट तपाईंले चाहेको अपेक्षा चाहिँ के हो ?
-मेरो कुनै अपेक्षा छैन । म हाल आफ्नो पेशामा रमाउन चाहन्छु ।
मिडियाबाट के अपेक्षा गर्नुहुन्छ ?
-आफू एमाले पार्टीको अर्थ तथा योजना विभागको सदस्य एम. अधिकारी होइन । र, नियुक्त भए पनि उक्त पदमा बस्दिन भनेर सार्वजनिक गरेको धारणा मिडियाले पनि बाहिर ल्याइदिए अभारी हुनेछु ।
जन आस्था
