काठमाडौं ।
बाजुराको बुढिगंगा नगरपालिकामा अहिले मत गणना चलिरहेको छ । बुढिगंगा नगरपालिकाको वडा नम्बर १० र १ मा मत गणना चल्दै गर्दा १० नम्बर वडामा एमालेले अग्रता बनाएको छ भने वडा नम्बर १ मा काँग्रेसले अग्रता कायम गरेको छ ।
वडा नम्बर १ मा प्रमुखमा चार सय मत गणना गर्दा सम्म कांग्रेसले १९५ र एमालेले १८५ मत प्राप्त गरेको छ । उपप्रमुखमा भने यो वडा एमाले अगाडी देखिएको छ ।
उपप्रमुखमा एमालेले १९० मत प्राप्त गर्दा कांग्रेसले १८७ मत प्राप्त गरेको छ । वडाध्यक्षमा कांग्रेस अगाडी छ । काँग्रेस १७९ मत पाउँदा एमाले १८४ मत पाएको छ ।
यहाँ मेयर पदका लागि नेपाली कांग्रेसबाट रङ्गबहादुर खाती र एमालेबाट रामबहादुर बानियाँ उम्मेदवार छन्। यस्तै, उपमेयरमा कांग्रेसबाट रिता शाही शाह र एमालेबाट मायाकुमारी खड्का कुँवर उम्मेदवार छन्।
बूढीगंगामा ३० वैशाखमा भएको स्थानीय चुनाव रद्ध गरी बिहीबार फेरि मतदान गरिएको हो ।
बूढीगङ्गामा १३ हजार ६ सय ५९ जना मतदातामध्ये ९ हजार १ सय २८ अर्थात ६६ दशमलव ८३ प्रतिशतले मतदान गरेका छन् । मतदानमा ३६.०२ प्रतिशत महिला र ३०.७३ प्रतिशत पुरुष सहभागी भएका छन् ।
सहायक प्रमुख जिल्ला अधिकारी लोकेन्द्रबहादुर विष्टका अनुसार वडा नम्बर १ मा ८३१, वडानम्बर २ मा एक हजार ११९, वडानम्बर ३ मा ७६७ , वडानम्बर ४ मा एक हजार २१०, वडानम्बर ५ मा ८१८ मत खसेको छ ।
यस्तैगरेर वडा नम्बर ६ मा ७९०, वडानम्बर ७ मा ८८१ , वडानम्बर ८ मा ७००, वडानम्बर ९ मा ९०३ र वडानम्बर १० मा एक हजार १०९ मत खसेको छ ।
१० वडामा १० मतदानस्थल र १९ वटा मतदान केन्द्र रहेका थिए । निर्वाचन धाँदलीरहित बनाउनका लागि नेपाली सेना, शसस्त्र प्रहरी, नेपाल प्रहरी र राष्ट्रिय अनुसन्धान गरेर एक मतदान स्थलमा एक सय भन्दा बढी सुरक्षाकर्मी परिचालन गरिएको थियो ।
वैशाख ३० गतेको चुनावमा सुरक्षा व्यवस्था कमजोर हुँदा २,३,५ र ९ एमाले, ४ र ७ मा कांग्रेसले वुथ कव्जा गरेको कारण यसपटक सुरक्षा व्यवस्था कडा बनाइएको थियो ।
