काठमाडौं । नेप्लिज टाइम्स डटकमका सम्पादक पुष्पा थपलिया नेपाल पत्रकार महासंघको एशोसियट प्रदेशमा महिलातर्फको उपाध्यक्ष पदमा निर्वाचित भएकी छिन् । शुक्रबार भएको निर्वाचनमा थपलियाले २१७ मत ल्याएर विजयी भएकी हुन् । स्वतन्त्र उम्मेदवारी दिएकी थपलियाले गठबन्धनमार्फत चुनावी मैदानमा होमिएका उम्मेदवारलाई पाखा लगाउँदै नयाँ कार्यसमितिको उपाध्यक्ष पदमा निर्वाचित हुन सफल भएकी हुन् ।
उनका प्रतिद्धन्दी पवित्रा मुडभरीले १८७ मत प्राप्त गरेकी छिन् । रेडियो सगरमाथा, उकेरा डटकमलगायत संचारमाध्यममा लामो समय पत्रकारिता गरेकी थपलिया केही वर्षदेखि नेप्लिज टाइम्स डटकममा सम्पादकको भूमिकामा छिन् । उनी कला एवम् मनारञ्जन क्षेत्रमा विशेष दख्खल राख्छिन् ।
महासंघको एशोसियट प्रदेशको अध्यक्षमा पनि स्वतन्त्र उम्मेदवार नै विजयी भएका छन् । स्वतन्त्र उम्मेदवार रोयल आचार्यले २६६ मत ल्याएर विजयी हुँदा स्मृति ढुंगानाले १९२ मत ल्याएर पराजित हुनुपरेको छ । यस्तै महासचिवमा अशेष अधिकारी २५४ मतसहित निर्वाचित भएका छन् । ४७२ मत खसेको एशोसियट प्रदेशतर्फ ३ वटा पदका लागि चुनावी प्रक्रियामा जानुपरेको हो भने अरु सदस्यहरु निर्विरोध निर्वाचित भएका छन् ।
