काठमाडौं । देशभर चुनावी माहोल सुरु हुँदा भक्तपुरमा पनि चुनावी चहल–पहल सुरु भइसकेको छ ।
सबैको चासोको रुपमा हेरिएको भक्तपुर २ मा यो पटकको चुनावमा कडा टक्कर हुने देखिएको छ । यो निर्वाचन क्षेत्रमा नेकपा माओवादी केन्द्रका केन्द्रीय सदस्य रामप्रसाद सापकोटा ‘दीपशिखा’ र नेकपा एमालेका नेता महेश बस्नेतबीच कडा टक्कर हुने देखिएको हो ।
दीपशिखाले सिन्धुपाल्चोक वा भक्तपुर २ मध्ये कुनै एक क्षेत्रबाट टिकट दिनका लागि गठबन्धनका नेताहरुसँग कुरा गरिरहेको बताएका छन् । यसपटक भक्तपुर क्षेत्रनं २ मा वाइसिएलका पूर्वअध्यक्ष र युवा संघका पूर्वअध्यक्षबीच टक्कर पर्ने सम्भावना बढेको छ ।
सरकारले आगामी मंसिर ४ गते प्रतिनिधिसभा र प्रदेशसभाको निर्वाचन मिति तय गरेको छ । दीपशिखाले प्रतिनिधिसभाका लागि आफ्नो उम्मेदवारी रहनेबारे खुलासा गरेका हुन् ।
उनले भने, मेरो जन्मथलो सिन्धुपाल्चोक हो । हाल भक्तपुरमा बसोबास छ । आगामी निर्वाचनमा मेरो पनि उम्मेदवारी रहन्छ भन्ने कुरा भएको छ । गठबन्धनले, पार्टीले निर्णय गरेको खण्डमा, टिकट दिएको खण्डमा सिन्धुपाल्चोक र भक्तपुरमध्ये कुनै एक क्षेत्रबाट उम्मेदवारी रहन्छ ।’
भक्तपुर क्षेत्रनं २ मा तुलनात्मक रुपमा माओवादी केन्द्र कमजोर छ । ०७४ को प्रतिनिधिसभा निर्वाचनमा यस क्षेत्रबाट एमालेका महेश बस्नेत विजयी भएका थिए । वाम गठबन्धनको साझा उम्मेदवार बनेका बस्नेतले नेपाली कांग्रेसका दमननाथ ढुंगानालाई दोब्बर मतले पराजित गरेका थिए । एमालेले यसपटक पनि बस्नेतलाई नै दोहोर्याउने पक्काजस्तै छ ।
माओवादी केन्द्रको बलियो जनमत सिन्धुपाल्चोक निर्वाचन क्षेत्र नं १ मा रहेको छ । सिन्धुपाल्चोक १ सभामुख तथा माओवादी केन्द्रका नेता अग्नि सापकोटाको क्षेत्र पनि हो । ०७४ को प्रतिनिधिसभा निर्वाचनमा माओवादी केन्द्रबाट गंगाबहादुर तामाङ निर्वाचित भएका थिए ।
अहिले युवाहरुलाई प्राथमिकता दिनुपर्छ भन्ने आवाज उठिरहेको छ, यस सन्दर्भमा तपाईंको विचार के हो रु भन्ने हाम्रो प्रश्नमा दीपशिखाले सबै राजनीतिक दलले युवाहरुलाई उम्मेदवार बनाउने विषयलाई प्राथमिकतामा राख्नुपर्ने बताए । युवाहरुलाई प्राथमिकतामा नराखे राजनीतिक दलहरुकै औचित्य नरहने उनले जिकिर गरे ।
उनले भने, ‘सबै राजनीतिक दलहरुले युवाहरुलाई प्राथमिकतामा राख्नुपर्छ । नयाँ अनुहारलाई प्राथमिकता नदिने हो भने स्वतन्त्र आदि इत्यादि भन्नेहरुले राजनीतिक दलको अस्तित्व समाप्त गर्छन् ।’
माओवादी केन्द्रले युवालाई पार्टीभित्र २० प्रतिशत अधिकार दिएको समेत दीपशिखाले दाबी गरे । यो स्थानीय तहको निर्वाचनमा माओवादीबाट ४० प्रतिशत युवाले जितेको उनको भनाइ छ ।
