काठमाडौं ।
नेपाल प्रेस युनियनको चुनावमा सरिता खनालले सबैभन्दा धेरै मत पाएकी छन् ।
महिला खुला तर्फ केन्द्रीय सदस्य उठेकी खनालले १३९३ मत खसेकोमा १ हजार २१ मत ल्याएर जित हासिल गरिन् । एक हजार भन्दा धेरै भोट ल्याउने उनी एक्लो उम्मेदवार हुन् ।
रेडियो नेपालमा कार्यरत खनाल प्रेस युनियनका पूर्वसचिव स्व. सूर्यकुमार क्षेत्रीकी श्रीमती हुन् । खनाललाई शिव लम्साल र अनिता विन्दु दुवैले आफ्नो प्यानलमा राखेका थिए ।यस्तै साजन परियारले ९८८, माधवप्रसाद घिमिरेले ९७४, ध्रुबसागर शर्माले ९०५ बालकृष्ण शर्माले ९०० मत ल्याएर केन्द्रीय सदस्य जिते ।
अध्यक्षमा निर्वाचित शिव लम्सालले ७४५ र प्रतिस्पर्धी अनिता विन्दुले ६ सय १२ मत पाईन् । पदाधिकारी तर्फ महासचिवमा दिलीप पौडेल फराकिलो अन्तरले विजयी भए ।
पौडेलले ८७८ भोट ल्याउँदा प्रतिस्पर्धी जगन्नाथ दुलालले ४६१ भोट पाए । यस्तै उपत्यका तर्फ उपाध्यक्षका उम्मेदवार जीवन भण्डारीले प्रतिस्पर्धी निरज खतिवडालाई भारी अन्तरले पराजित गरे । भण्डारीले ८४२ र प्रतिस्पर्धी खतिवडाले ४६२ भोट पाए ।
