काठमाडौं ।
भारत भ्रमणमा रहेका नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ र प्रधानमन्त्री शेरबहादुर देउवापत्नी आरजु राणा दिल्लीस्थित नेपाली राजदूतावासमा पुगेका छन् ।
दूतावासमा प्रचण्ड र राणा नेपाली राजदूत डा. शंकर शर्मासँग छलफल गरिरहेका छन् ।
प्रचण्ड ३ दिने भ्रमणका क्रममा शुक्रवार दिल्ली पुगेका छन् भने राणा त्यसअघि नै दिल्ली पुगेकी थिइन् । दुवैले दिल्लीमा रहँदा सत्तारुढ भारतीय जनता पार्टी (भाजपा) नेताहरूसँग छलफल गर्ने कार्यक्रम छ ।
प्रधानमन्त्री एवम् नेपाली कांग्रेसका सभापति शेरबहादुर देउवा पत्नी आरजु र माओवादी केन्द्रका अध्यक्ष प्रचण्ड एकैपटक भारत पुग्नुलाई अर्थपूर्ण रुपमा हेरिएको छ ।
संसदीय चुनावको मिति तोक्ने तयारी भइरहँदा उनीहरु भारत भ्रमणमा निस्किएसँगै नेपाली राजनीतिमा थप तरंग पैदा भएको छ ।
केही दिनअघि मात्रै चिनियाँ टोलीले नेपाल भ्रमण गरेको र लगत्तै प्रचण्ड र आरजु भारत भ्रमणमा निस्किएपछि यसमा कुनै रणनीति मिसिएको भन्दै खैलाबैला मच्चिएको छ ।
पछिल्लो समय सत्ता गठबन्धन ट्टाउन विभिन्न चलखेलहर सुरु भएका छन् । नेकपा एमालेका नेताहर जसरी हुन्छ सत्ता गठबन्धन टुटाउनुपर्ने मिसनसहित अघि बढेका छन् ।
