काठमाडौं । काठमाडौंको मेयर उम्मेदवारमा स्वतन्त्र उम्मेदवार बालेन साह जिततर्फ लम्किरहेका छन् ।
वडाध्यक्षको प्रतिस्पर्धामा कांग्रेस र एमालेको कडा टक्कर छ । सुरुमा मत परिणाम घोषणा भएका वडाहरुमा लगातार एमाले उम्मेदवार विजयी भएका थिए । अहिले भने कांग्रेसले एमालेलाई उछिनेको छ ।
भर्खरै वडा नम्बर २४ को वडाध्यक्ष जित्दै कांग्रेसले एमालेलाई उछिनेको हो । यस वडामा कांग्रेसका विनोदकुमार राजभण्डारी १११२ मतसहित विजयी भए । उनले ११२२ भोट ल्याउँदा एमालेका प्रतिस्पर्धी सुजनविलास बज्राचार्यले ९५५ मत प्राप्त गरे ।
मेयरमा भने यस वडामा सबैभन्दा बढी एमालेलाई भोट खसेको छ । स्थापितले ९१० भोट ल्याउँदा दोस्रो स्थानमा कांग्रेसकी सिर्जना सिंहले ७६० भोट ल्याएकी छन् ।
यस्तै स्वतन्त्र उम्मेदवारहरु बालेन साह र सुमन सायमीको क्रमशः ६०२ र ३८० भोट आएको छ । हालसम्म काठमाडौंका १५ वटा वडाको मतगणना सम्पन्न हुँदा ८ वटा वडामा कांग्रेस र ७ वटामा एमाले उम्मेदवार विजयी भएका छन् ।
वडा नम्बर ६, ७, ८, २४, २७, २८, २९ र ३० कांग्रेसको पोल्टामा परेको छ भने वडा नम्बर १, २, ३, ४, ५, ३१, र ३२ मा एमालेले जित हासिल गरेको छ ।
यस्तै वैशाख ३० गते सम्पन्न स्थानीय तह निर्वाचनको नतिजाअनुसार अघिल्लो पटकको ठूलो दल नेकपा एमाले यसपटक दोस्रो स्थानमा खुम्चिएको छ । आइतबार दिउँसोसम्ममा एमालेले १९० तहको नेतृत्व (अध्यक्ष/मेयर) मा जित निकालेको छ । पहिलो भएको नेपाली कांग्रेसले हालसम्म ३११ तहको नेतृत्व जितिसकेको छ ।
एमालेलाई हराउन सत्तारूढ गठबन्धनका पाँचदलले देशैभर तालमेलको प्रयास गरेका थिए । तर सम्भव भएन । त्यसपछि सत्तारूढ गठबन्धनले सकेसम्म पूर्ण (पाँचवटै दल) र नसकेका ठाउँमा आंशिक (मिलेजति दलहरू सम्मिलित) तालमेल गरेका थिए । अधिकांश ठाउँमा एक्लाएक्लै लडेका थिए ।
अहिलेको नतिजा हेर्दा सत्तारूढ गठबन्धनका दलहरूले एमालेको विरासत रहेका अधिकांश तहमा तालमेल गरेर एमालेलाई हराएका छन् । तर, जितेका तहहरूमध्ये झण्डै ५३ प्रतिशत तहमा भने एमालेले गठबन्धन दलको तालमेललाई नै हराएर जित निकालेको देखिएको छ ।
अहिलेसम्म एमालेले जितेका १९० तहमध्ये तीन तहमा जित निकाल्न एमालेले अन्य दलको सहारा लिएको देखिन्छ । जसमा दुई तहमा नेकपा माओवादी केन्द्र र एक तहमा कांग्रेससँग तालमेल गरेर जितेको छ, भने एकमा निर्विरोध जितेको छ ।
यस्तै सबै दलहरू एक्लाएक्लै लडेका ८५ तहमा एमालेले जित निकालेको देखिन्छ भने १०० मा गठबन्धनलाई हराएर देखिन्छ । प्रदेशगतरूपमा प्रदेश १ का ४२ तहमा जित निकाल्दा १७ तहमा एक्लाएक्लै लडेर जित्दा २६ पालिकामा गठबन्धनलाई हराएर जितेको छ । यस्तै मधेस प्रदेशका कुल २३ पालिका जित्दा २१ एक्लाएक्लै र २ पालिका गठबन्धनलाई हराएर जितेको छ ।
वागमती प्रदेशमा कुल २६ तह जितेको एमालेले दुई पालिकामा माओवादी केन्द्रसँग तालमेल गरेर जित्दा सबै दल एक्लाएक्लै लडेको ६ तहमा जितेको छ । बाँकी १८ पालिकामा गठबन्धनलाई हराएर जितेको छ ।
यस्तै गण्डकी प्रदेशका कुल ३५ तहमा एमाले जितेको छ । जसमा सबै दल एकलाएक्लै लडेको १९ तहमा जित निकाल्दा १६ तहमा गठबन्धनमाथि जित निकालेको छ ।
लुम्बिनी प्रदेशमा कुल २५ तहमा जित निकाल्दा १ तहमा कांग्रेससँग तालमेल गरेर जितेको एमालेले १७ तहमा गठबन्धनलाई हराएर जितेको छ, भने सबै दल एक्लाएक्लै लडेका ७ तहमा जित निकालेको छ ।
उता कर्णाली प्रदेशका १५ तहमा एमालेले जित निकाल्दा एकमा निर्विरोध जितेको छ भने सबै दल एक्लाएक्लै लडेका ५ तहमा जितेको छ । ९ तहमा गठबन्धनलाई हराएर जितेको छ । सुदूरपश्चिम प्रदेशका १५ तहमा गठबन्धनमाथि जित निकालेको एमालेले एक्लाएक्लै लडेका ९ तह थप्दै कुल २४ तह जितेको छ ।
