अछाम । सत्ता गठबन्धनले स्थानीय तहको निर्वाचनमा तालमेलको सहमति गरेपनि नेपाली काँग्रेस अछामका तीन पालिकाकाले अस्वीकार गरेका छन् ।
साँफेबगर नगरपालिका तथा रामारोशन र चौरपाटी गाउँपालिकाले सत्ता गठबन्धनको निर्णय अस्वीकार गरेको हो । उनीहरुले चुनावमा तालमेल नगर्ने निर्णय गरेका छन् । नगर तथा गाउँकार्य समितिको बैठकले तालमेल नगर्ने निर्णय गरेका हुन् ।
काँग्रेस बलियो रहेको क्षेत्रमा तालमेल गरेर जान नसकिने काँग्रेस साफेबगर नगर सभापति लालबहादुर कुँवरले बताए । उनले काँग्रेसको जनाधारको कदर हुनेगरी निर्णय लिइएको भन्दै तीन पालिकामा काँग्रेस, माओवादी केन्द्र र एकीकृत समाजवादीले दाबी गरिरहे पनि सहमति जुट्न सकेको थिएन ।
यस्तै प्रधानमन्त्री शेरबहादुर देउवाले गठबन्धनलाई मिलाएर लैजाने सबै जिम्मेवार हुनुपर्ने बताएका छन् । शनिबार पार्टी कार्यालय सानेपामा बसेको केन्द्रीय कार्यसम्पादन समिति बैठकमा कांग्रेस सभापतिसमेत रहेका देउवाले यस्तो बताएका हुन् ।
काँग्रेसको नेतृत्वमा गठबन्धनको सरकार रहेको भन्दै उनले चुनावी तालमेलका लागि काँग्रेसकै नेतृत्व संयन्त्र बनेकोले आफूहरु अलि धेरै जिम्मेवार हुनुपर्ने बताए । गठबन्धनबीच चुनावी तालमेल हुने निर्णय भइसकेको भन्दै उनले कार्यान्वयन गरेर जाने कुरामा सबैले सहजीकरण गर्नुपर्ने बताए ।
बैठकमा कार्यसम्पादन समितिका सदस्यले गठबन्धनको निर्वाचन तयारी तथा अनुगमन समितिलाई महानगर र उपमहानगरको प्रमुख र उपप्रमुखमा पार्टीको स्ट्रेन्थ अनुसार दाबी राख्न सुझाएका थिए । सहमहामन्त्री महालक्ष्मी उपाध्यक्षका अनुसार यस विषयमा थप छलफल गर्न पार्टी उपसभापति पूर्णबहादुर खड्काले भोलि पनि बैठक बोलाइएको छ ।
यस्तै नेपाली कांग्रेसका महामन्त्री विश्वप्रकाश शर्माले भरतपुर महानगरपालिकाका कांग्रेस र माओवादी केन्द्रले तालमेल नगर्ने प्रस्ताव अघि सारेका छन् ।
केन्द्रीय कार्यलय सानेपामा बसेको केन्द्रीय कार्यसम्पादन समिति बैठकमा महामन्त्री शर्माले २०७४ मा माओवादीलाई मेयर छाडेकाले यो पटक कांग्रेसलाई सघाउनुपर्ने बताए ।
यो पटक माओवादी केन्द्रले भरतपुर महानगरपालिका छाड्नुपर्ने भन्दै उनले त्यसो नभए कांग्रेस र माओवादी केन्द्रबीच तालमेल हुन नसक्ने र एक्लैएक्लै चुनाव लड्नुपर्ने बताए ।
माओवादी केन्द्रले कांग्रेसलाई मेयर नछाड्ने भए मित्रवत प्रतिस्पर्धा गर्नुपर्ने भन्दै उनले व्यक्तिगत रुपमा आफू देशभर एक्लै लड्नुपर्छ भन्ने पक्षमा रहेको बताए ।
निजात्मक बुझाइ, भावनात्मक आवेग र धरातलीय यथार्थबीच जो फरक हुन्छ, त्यही गाम्भीर्यताले तालमेल गर्न सहमत भएको भन्दै उनले यस्तो बताएका हुन् । आफूहरुको निर्णय गठबन्धन नभई तालमेल मात्रै रहेको भन्दै उनले त्यो पनि स्थानीय स्थिति र आवश्यकता अनुरुप हुनुपर्ने बताए ।
