काठमाडौं । स्थानीय चुनावमा तालमेल गर्ने सत्तारुढ दलहरुको सहमतिलाई तल्लो तहसम्म कार्यन्वयन गर्न समस्या भइरहेको छ । सत्तारुढ गठबन्धनका दलहरुबीच जिल्ला स्तरमा सहमति जुट्न नसकेपछि धेरैजसो ठाउँमा गठबन्धन टुटेको छ ।
जनता समाजवादी पार्टी जसपाले कैलालीका स्थानीय तहमा सत्ता गठबन्धनसँग चुनावी तालमेल नगर्ने घोषणा गरेको छ । जसपाले पाँच दलीय गठबन्धन तोडेर लोकतान्त्रिक समाजवादी पार्टी कैलाली, नेपाल लोकतान्त्रिक पार्टी कैलाली र सङ्घीय लोकतान्त्रिक राष्ट्रिय मञ्च कैलालीसँग तालमेल गर्ने निर्णयसमेत गरेको छ ।
कैलालीको धनगढीमा चार दलले संयुक्त रुपमा पत्रकार सम्मेलन गरी स्थानीय तहको निर्वाचनमा तालमेल गरेर जाने बताएका हुन् । पाँच दलीय गठबन्धनले अन्य दलसँग चुनावी तालमेल गर्न नपाइने नीति बनाएपनि जसपाले कैलालीमा तोडेको हो ।
यस्तै लगातार पाँच दिनसम्म संखुवासभाको खाँदबारीमा चलेको सत्तारुढ गठबन्धनको बैठकले तालमेलको सहमति जुटाउन नसकेको हो । शुक्रबार बसेको बैठकमा पनि भागबण्डाको कुरा नमिलेपछि गठबन्धनका नेताहरु बिना निष्कर्ष उठेर हिँडेका एक नेताले बताए । माओवादी केन्द्रसँग गठबन्धन हुने सम्भावना सकिएको गठबन्धनका संयोजक एवम् कांग्रेस सभापति दीपक खड्काले बताए ।
माओवादीसँग अब गठबन्धन नहुन्े तर तर बाँकी दलहरुसँग छलफल हुने खड्काले बताए । माओवादी केन्द्रले आफ्नो मतभार भन्दा बढी भाग खोजेपछि तालमेलबारे सहमति जुट्न नसकेको उनले बताए ।
माओवादी केन्द्र बाहेक नेकपा एकीकृत समाजवादी, जनता समाजवादी पार्टी र राष्ट्रिय जनमोर्चासँग भने जिल्ला स्तरमा छलफल हुने उनले बताए ।माओवादी केन्द्रका केन्द्रीय एवम् संखुवासभा इन्चार्ज राजेन्द्र कार्कीले पनि जिल्ला स्तरमा तालमेलको सहमति जुट्ने सम्भावना सकिएको बताए ।
कांग्रेसको अन्तरविरोधका कारणले तालमेलमा सहमति नजुटेको तर औपचारिक रुपमै गठबन्धन टुटेको निष्कर्षमा भने आफूहरु नपुगेको उनको भनाई छ ।
कांग्रेस नेताहरुले भने सहमति जुटाउन बसेको बैठकबाटै माओवादी केन्द्र गठबन्धन नरहने भन्दै निस्केकाले अब छलफल नहुने बताएका छन् । एकीकृत समाजवादीका केन्द्रीय सदस्य एवम् संखुवासभा इन्चार्ज हेमराज घिमिरेले भने अझै पनि पाँच दलीय गठबन्धन जोगिने बताउँछन् ।
गएको २०७४ को निर्वाचनमा संखुवासभामा कांग्रेसले दुई नगरपालिका सहित ५ स्थानीय तह जितेको छ । बाँकी स्थानीय तह नेकपा एमालेले जितेको छ । संखुवासभामा ५ नगरपालिका र ५ गाउँपालिका छ ।
