नेपाली कांग्रेसका प्रवक्ता डा. प्रकाशशरण महतले ‘घर घर जाऊँ, कांग्रेसलाई जिताऊँ’ मूल नारासहित फागुन २९ गते थालिएको एक महिने अभियान सफल भएको बताएका छन्। पार्टी केन्द्रीय कार्यालय सानेपामा मंगलबार पत्रकार सम्मेलन गरेर महतले यस्तो बताएका हुन्।
‘एक महिने अभियान उत्साहका साथ सम्पन्न भएको छ। फागुन २९ बाट एक महिने अभियान सुरु भएको थियो। अभियानका क्रम्मा १० औं हजार टोल समिति गठन भएका छन्’, उनले भने, ‘कांग्रेसको संगठनको पहुँच व्यापक रुपमा विस्तार भएको छ। हाम्रो संगठन टोल टोलमा पुगेको छ।’
महतले एमाले अध्यक्ष केपी शर्मा ओलीका जनविरोधी र असंवैधानिक कामबारे जनतामा कुरा राखेको पनि बताए।’एमसीसीबारे व्यापक रुपमा जनमानसमा भ्रम चिर्ने काम भएको छ। ओलीका असंवैधानिक कदमको पनि हामीले जनतामा व्याख्या गर्यौँ’, उनले भने, ‘अभियानका क्रममा मतदाताका गुनासो, चासो, चिन्ता, सरोकारका बिषय सुन्यौँ। कांग्रेसको तर्फबाट आफ्नो कुरा राख्यौं।’
त्यस्तै नेपाली कांग्रेसले विधानले गरेको व्यवस्था अनुसारको अधिकार प्रयोग गरेर नै निर्वाचनमा तालमेल गर्ने जनाएको छ । पार्टी प्रवक्ता डा. प्रकाश शरण महतले आज पत्रकार सम्मेलन गर्दै यस्तो बताएका छन् ।
‘कहाँ आवश्यक छ ? के आवश्यक छ ? त्यसको निर्णय विभिन्न तहहरूको संरचनालाई जुन हाम्रो विधानले दिएको अधिकार दिएको छ,’ उनले भने,‘त्यो अनुसार नै सम्पन्न हुन्छ ।’स्थानीय तह निर्वाचनमा तालमेलका कुरा राष्ट्रिय निर्वाचनजस्तो सहज नभएको पनि उनले बताए ।
उनले भने, ‘टुंगो लाउन जटिल नै छ । किनभने तल्लो तहको राष्ट्रिय निर्वाचनजस्तो सहज केन्द्रीय नेताहरू बसेर सीमित संख्याको संसद् संख्या बाँडफाँट गरेजस्तो होइन ।’यद्यपि तालमेलको कुरा पार्टीको निर्णय अनुसार नै टुंगोमा पुग्ने प्रवक्ता महतले बताए ।
‘यसमा केन्द्रीय समितिले निर्णय गरेको छ । जसमा चाहिँ हामीले केन्द्रीय समितिले स्थानीय परिस्थिति र आवश्यकता अनुसार गठबन्धनमा रहेका दलहरूसँग हामीले तालमेल गर्ने भन्ने कुरा नै हो,’ उनले भने ।
कांग्रेसको विधानले महानगरपालिकाको टिकट केन्द्रीय समिति, उपमहानगरपालिका र नगरपालिकाको टिक प्रदेश समिति, गाउँपालिकाको टिकट जिल्ला समिति र वडाको टिकट प्रतिनिधिसभा निर्वाचन क्षेत्र समितिले वितरण गर्ने अधिकार दिएको छ ।
गठबन्धनभित्र रहेका नेकपा माओवादी केन्द्र, नेकपा एकीकृत समाजवादी र जनता समाजवादी पार्टीले सिटको बाँडफाँट केन्द्रबाटै हुनुपर्ने अडान लिइरहेका छन् ।
