धादिङ । धादिङ न्यूज डटकमका प्रधानसम्पादक केशव अधिकारीले आफूले सिद्धलेक गाउँपालिकासँग बार्गेनिङ या ब्ल्याकमेलिङ केही पनि नगरेको प्रतिक्रिया दिएका छन् ।
गाउँपालिकाका अध्यक्ष परशुराम खतिवडाले हुँदै नभएको आरोप लगाएर आफ्नो बदनाम गर्ने प्रयास गरेको उनको दाबी छ । पत्रकार अधिकारी, पत्रकार महासंघका अध्यक्ष सिताराम अधिकारी र बागमतीकलमका प्रधानसम्पादक अनिल नेपालीले ब्ल्याकमेलिङ गरेको भन्दै गाउँपालिकाका अध्यक्ष खतिवडाले प्रेस काउन्सिलमा उजुरी दिएका छन् ।
त्यहि उजुरीको आधारमा नेप्लिज टाइम्स डटकममा समाचार प्रकाशित भएको थियो । समाचारमा भनिएजस्तो आफूले पालिकासँग बार्गेनिङ या ब्ल्याकमेलिङ नगरेको अधिकारीको भनाई छ । नेप्लिजटाइम्ससँग कुरा गर्दै उनले आफ्नो २५ वर्षको पत्रकारितामा अहिलेसम्म कोहीसँग कुनै बार्गेनिङ गरेर समाचार नलेखेको दाबी गरेका छन् ।
यस्तो छ उनको भनाई जस्ताको त्यस्तै :
धादिङ जिल्ला सिद्धलेक गाउँपालिकाको शिक्षा समितिको मिति २०८२-०४-२९ गतेको निर्णय अनुसार गाउँपालिका भित्रका बिद्यालय समायोजन (खारेजी), शिक्षक सरुवा, बिद्यालय वर्गिकरण लगायतका बिषयमा गाउँपालिकाको वेभसाईट मा राखिएको सूचनाका आधारमा मैले २०८२-०५-०३ गते धादिङ न्यूज डटकम मा सिद्धलेकका ९ वटा विद्यालय वन्द गरिने शीर्षकमा समाचार लेखेको थिएँ ।
शिक्षा समितिको निर्णयलाई आधार मानि समाचारमा विद्यालय समायोजन (खारेजी), शिक्षक सरुवा र बिद्यालय बर्गिकरणको बिषयलाई समेटेर समाचार लेखेको हो ।
सोही क्रममा सिद्धलेक–७ को भाल्डाँडामा रहेको जाल्पादेवी आविमा अंग्रेजी बिषयको शिक्षक दरवन्दी सहित सरुवा गरेकोमा त्यहाँका स्थानीयले बिद्यालय तालावन्दी गरेर पठनपाठन रोकेको भिडियो सहितको जानकारी दिएपछि त्यस बिषयलाई पनि समाचारमा जोडेको थिएँ ।
सार्वजनिक सरोकारका बिषयमा समाचार लेख्नु मेरो धर्म हो । भदौ ३ गते विहान समाचार पोष्ट गरेर म काम बिशेषले काठमाण्डौं गएको थिएँ । ४ गते म आफ्नो व्यवसाय रहेको स्थान सिद्धलेक ४ बुङचुङ पुगें । जुन गाउँपालिका कार्यालय नजिकै छ ।
डेस्कटप सम्वन्धी सेवा र अनलाइनको कार्यालय पनि त्यहि रहेकाले अधिकांश काम म त्यहिबाट गर्दछु । पसलमा आएका सेवाग्राहीको काम गरिरहेको समयमा भदौ ४ गते अपरान्ह १२ः३० वजे तिर गाउँपालिकाका सुरक्षाकर्मी निरज भट्ट पालिकाको कम्व्याट ड्रेस मेरो कार्यकक्षमा आई तपाईलाई अध्यक्ष ज्यूले वोलाउनु भएको छ तुरुन्त अध्यक्षकोमा हिड्नुहोला भने ।
मैले आफू काम गरिरहेको र केहीबेरमा आउने जानकारी दिँदा अध्यक्ष ज्यूले तुरुन्तै वोलाएर ल्याउनु भन्नु भएको छ भनेपछि चलिरहेको कम्प्युटर सिष्टमबाट वन्द गरि युपिएस समेत बन्द गरेर पसलबाट अध्यक्षको कार्यकक्षतर्फ गएँ ।
म त्यहाँ पुग्दा अध्यक्षको कार्यकक्षको ढोका वन्द थियो । एकछिन बाहिर उभिए पछि मलाई वोलाउन जाने सुरक्षाकर्मीलाई सोधेँ । भित्र त अर्कै मिटिङ जस्तो छ के हो भनेँ । उनले तपाईसमेत बस्ने मिटिङ हो भित्र जानुस भनेर ढोका खोली दिएपछि भित्र पस्दै कुर्सीमा बसिरहेका अध्यक्ष परशुराम खतिवडालाई शिष्टाचार पुर्वक नमस्कार अध्यक्ष ज्यू भने ।
उनले नमस्कार पनि फर्काएनन । मलाई देख्नासाथ उल्टै बिद्यालय वन्द भएको भनेर किन समाचार लेखेको, कस्ले भनेर लेखेको अरुलाई लेख्न किन लगाएको, के भनेर पालिकाको समाचार लेखेको भने ।
मैले कुन समाचारको कुरा गर्नु भएको भनि सोध्दा अनिल नेपालीको अनलाइनमा तपाईले किन समाचार लेखाएको भन्दै झर्रो भाषामा वोलिरहे । त्यति बेला कार्यकक्षमा प्रमुख प्रशासकीय अधिकृत रामप्रसाद शर्मा, शाखा अधिकृत अनिल दुवाडी, गाउँपालिका प्रहरीका इन्चार्ज हवल्दार रण बहादुर घले र अन्य ४÷५ जना व्यक्ति थिए ति को को हुन म चिन्दिनँ ।
। म भित्र पसेको केहीबेरमा प्रमुख प्रशासकीय अधिकृत शर्मा कार्यकक्षबाट बाहिर निस्कनु भयो । अरु त्यहिं थिए । नगर प्रहरी लगाएर कार्यकक्षमा वोलाउने र समाचार संग असम्वन्धित व्यक्तिलाई राखेर समाचारको बारेमा स्पष्टीकारण लिने अध्यक्षको शैली सरासर गलत छ ।
उहाँले समाचारमा चित्त नबुझेको भए दुई जना मात्रै बसेर कुराकानी गर्न पनि सकिन्थ्यो ।
तर उहाँबाट जंगी शैलीको व्यवहार भएकोमा मेरो आपत्ति हो । पालिका अध्यक्ष सुरक्षा निकायको अधिकारी होइन जनताको सेवक हो । उहाँको शैली जनमुखी हुनुपर्छ भन्ने मेरो मान्यता हो ।
मैले अध्यक्षलाई समाचारको बिषयमा तपाईले मलाई किन हप्काएको विधि अनुसार खण्डन गर्ने प्रकृयामा जानुहोस भन्दा मलाई वेवास्ता गरी पत्रकार अनिल नेपालीको नम्बर दिनुस भन्नु भयो । मैले म संग अनिल नेपालीको नम्बर नभएको जानकारी दिएपछि शाखा अधिकृत दुवाडीले नम्बर खोजेर अध्यक्षलाई उपलव्ध गराएपछि त्यो समाचार किन लेखेको, कस्ले लेख भनेर लेखेको, मेरो गाउँको बारेमा किन समाचार लेख्नु प¥यो भन्दै अनिललाई पनि अध्यक्षले मोवाईलबाट हप्कीदप्की गर्नुभयो ।
त्यो दिन त्यतिकै भयो । पत्रकार महासंघका अध्यक्ष धादिङ वाहिर भएकाले भेट्न सकिएन । ८ गते बेलुकी उहाँ संग कुराकानी भयो । मैले चार गते सिद्धलेक गाउँपालिकामा भएको जे हो त्यो जानकारी जानकारी गराएँ ।
९ गते उहाँले महासंघको तर्फबाट घटनाको निन्दा गर्दै बिज्ञप्ति निकाल्नु भयो । बिज्ञप्ति नेपाल पत्रकार महासंघ केन्द्रिय समिति, प्रेस चौतारी नेपाल, समाजवादी प्रेस संगठनले पनि निकाले । त्यहि बिज्ञप्तिको आधारमा विभिन्न सञ्चार माध्यममा समाचार आएपछि गाउँपालिका अध्यक्षले शुरुको समाचार लेख्ने केशव अधिकारी, अनिल नेपाली र पत्रकारलाई गरिएको अपमानजनक व्यवहारबिरुद्ध बिज्ञप्ति निकाल्ने महासंघ अध्यक्ष सीताराम अधिकारीलाई उल्टै झूटो आरोप लगाई भदौ १२ गते प्रेस काउन्सिल नेपाललाई उजुरी दिनुभएछ ।
सोही उजुरीको छायाँ प्रति सिसिटिभी फुटेज समेत राखी मेरो समेत नाम जोडेर लेखेको समाचारमा कुनै सत्यता छैन । गाउँपालिका अध्यक्षले लगाउनु भएको आरोप पुष्टि गर्न म उहाँलाई चुनौती दिन चाहन्छु ।
अध्यक्ष खतिवडा संग पहिलो पटक २०८२ भदौ ४ गते उहाँको कार्यकक्षमा मैले भेटेको हुँ । यसअघि उहाँ सँग तीन पटक गरी १०÷१५ सेकेण्ड जति कुरा भएको छ । मैले आजसम्म सिद्धलेक गाउँपालिकामा कुनै किसिमको काम दिनुस भनेर कोहीसँग मागेको छैन, अध्यक्षले लगाउनु भएको आरोपको पुष्टि गर्ने आधार पेश गर्न आग्रह गर्न चाहन्छु ।
मैले पालिकासंग सम्वन्धित अत्यावश्यक सेवा दिएपनि मेरो लागि काम दिनुस भनेको छैन । कोही संग कुराकानी गरेको भए प्रमाण पेश गर्न अनुरोध गर्दछु । हुंदै नभएको आरोप लगाएर मेरो वदनाम गर्ने काम जो जोबाट भएको छ तिनिहरुबिरुद्ध कानूनी उपचारमा जान अब म बाध्य हुनेछु ।
मैले २५ बर्षको पत्रकारितामा कोहीसँग कुनै वार्गेनिङ गरेर समाचार लेखेको छैन । पत्रकारको धर्म भनेको ओझेलमा परेका बिषयलाई समाचार वनाउनु हो । सिद्धलेक गाउँपालिका अध्यक्षले समाचार र पत्रकारिताको मर्म बुझ्न नसक्दाको कारण यो समस्या निम्तिएको हो ।
केशव अधिकारी
धादिङ न्यूज डट कम
