काठमाडौं ।
नेपाली कांग्रेसका नेता प्रदीप गिरीको आज आईतबार अन्त्येष्टि गरिने भएको छ । समाजवादी चिन्तक कांग्रेस नेता प्रदीप गिरिको आइतबार अन्त्येष्टि गरिने भएको नेपाली कांग्रेसले जनाएको छ ।
कांग्रेस महामन्त्री विश्वप्रकाश शर्माका अनुसार आइतबार नै अन्त्येष्टि गरिने भएको छ । गिरिको शव बिहान ११ बजेसम्म मेडिसिटी हस्पिटलको शिवालयमा राखिनेछ ।
त्यसपछि, २ बजेसम्म कांग्रेस केन्द्रीय कार्यालयमा रहेको बिपी स्मृति भवनमा राखिने केन्द्रीय कार्यालयका मुख्यसचिव कृष्णप्रसाद पौडेलले जानकारी दिए । घाँटीको क्यान्सरबाट पीडित गिरिको मेडिसिटी अस्पतालमा उपचारको क्रममा शनिबार राति साढे नौ बजे निधन भएको हो ।
उपचारमा संलग्न क्यान्सर रोग विशेषज्ञ डा. पंकज वर्मनका अनुसार शरीरका अन्य भागमा पनि क्यान्सर फैलिएपछि बिहीबारदेखि भेन्टिलेटरमा राखेर उपचार गरिएको थियो ।
गिरि प्राणघातक क्यान्सर रोगबाट ग्रसित भई भारत स्थित हिन्दुजा लगायतका प्रसिद्व अस्पतालको उपचार पश्चात बिगत २६ दिनदेखि नेपाल मेडीसिटी अस्पताल भैंसिपाटिमा उपचारका लागि भर्ना भएका थिए ।
पछिल्लो तीन दिनदेखि गिरिको आईसीयूको ५५० नम्बरको बेडमा उपचार भइरहेको थियो । गिरिको स्वास्थ्य लाभको कामना गर्दै काठमाडौंमा शुक्रबार प्रार्थाना सभा आयोजना गरिएको थियो । साथै उनको जन्म स्थल सिरहाको बस्तीपुरमा समेत शुक्रबार किर्तन लगाउने र तुलसीमोठमा साँझपख बत्ति बालेर स्वास्थ्य लाभको कामना गरिएको थियो ।
शुक्रबार गिरिलाई भेटेर फर्किएका कांग्रेस नेता बिमलेन्द्र निधिले ‘स्तब्ध र निरिह छु । ईश्वरीय चमत्कारका लागि प्रार्थना गर्दैछु, सबैले प्रार्थना गरौं’भनेर ट्वीट गरेका थिए ।
शुरुमा नेपाली कांग्रेसका नेता प्रदीप गिरिको घाँटीको देब्रे भागमा सानो आकारको ट्यूमर देखिएको थियो । ट्यूमर अन्त कतै नफैलिएकाले चिन्ता गर्नुपर्ने अवस्था नरहेको अस्पतालले जनाएको थियो ।
गतबर्ष साउन महिनामा भारतमा उपचार शुरु भएर नेपाली कांग्रेसको १५ औं महाधिवेशन सम्पन्न भएपछि एक साताको लागि काठमाडौं आएका गिरि डाक्टरहरुकै सल्लाहमा फेरी उपचारका लागि मुम्वई गएका थिए ।
पाँच बर्ष अघि उनलाई प्रोस्टेड क्यान्सर भएकाले मुम्वईमा उपचार पछि पूर्ण निको भएर नियमित औषधी खाँदै थिए । गिरिका बुबा मित्रलाल गिरी नेपाली कांग्रेसका नेता भएकाले सानै उमेरमा उनी राजनीतिमा संलग्न रहेका थिए ।
वि.सं. २०१७ सालदेखि सक्रिय राजनीति प्रारम्भ गरेका गिरि राजनीतिक संघर्षका क्रममा २०२५ सालमा १८ महिना र २०४२ सालमा झण्डै एक वर्ष र २०४५ सालमा बहुदलिय व्यवस्थाको पक्षमा आन्दोलन अगाडी बढाउने क्रमको शुरुवातमै पक्राऊ परेका थिए ।
उनी २०२४ सालमा नेपाल छात्र सङ्घ (बनारस)को निर्वाचित उपाध्यक्ष थिए भने पटक पटक नेपाली कांग्रेसको केन्द्रिय सदस्य रहेका थिए । कांग्रेसमा शेरबहादुर देउवालाई साथ दिने व्यक्तित्वका रुपमा चिनिएका गिरिले १५ औं महाधिवेशनको दोस्रो चरणको निर्वाचनमा प्रकाशमान सिंह र बिमलेन्द्र नीधिलाई देउवाको पक्षमा लाग्न सहमत गराउन भारतमा बसीबसी महत्वपूर्ण भूमिका खेलेका थिए ।
प्रदीप गिरि आफू २०५१ सालको संसदीय निर्वाचनमा सिरहा क्षेत्र नं. ५ बाट निर्वाचित भएका थिए भने पछि संविधानसभामा समानुपातिक सांसदको रुपमा र २०७४ सालमा सिरहा क्षेत्र नं. १ बाट संघीय सांसदमा विजयी भएर अहिले सांसदको रुपमा रहेका थिए ।
कहिल्यै मन्त्री हुन नचाहने प्रदीप गिरिले केहीलाई मन्त्री भने बनाएका थिए । उनी हक्की र राजनीतिक ज्ञानले ओतप्रोत भएका व्यक्तिको रुपमा परिचित थिए । उनले राजनीतिक विश्लेषणमा जहिलेपनि धार्मिक उदाहरणहरु दिने र नेपाली कांग्रेसलाई संकटपर्दा संसदमा बेला बखत निकासको बिचार दिएर उनलाई कांग्रेस चाहिनु भन्दा नेपाली कांग्रेसलाई प्रदीप गिरि चाहिएको छ भन्ने सन्देश दिन सफल भएका थिए ।
भारतको जवाहरलाल नेहरू विश्वविद्यालयबाट अर्थशास्त्रमा स्नातकोत्तर गरेका गिरिले नेपालको बिषयमा उक्त विश्वविद्यालयमा विद्यावारिधी गर्न आउने विद्यार्थीहरुको लागि नेपालको बारेमा आधारभुत जानकारी दिनका लागि प्राध्यापन समेत गरेका थिए । गिरिले लेनिन, नारी, मार्क्सवाद, गान्धी, लोहिया, विपीका बारेमा दर्जनौ पुस्तकको लेखक र सम्पादक भएर पुस्तक प्रकाशन गरेका थिए ।
