काठमाडौं ।
नेकपा माओवादी केन्द्रका अध्यक्ष पुष्पकमल दाहाल प्रचण्डले आफ्नो भारत भ्रमणबारे अनावश्यक भ्रम फैलाएको भन्दै सचेत हुन आग्रह गरेका छन्।
शनिबार जनकपुरधाम पुगेका अध्यक्ष प्रचण्डलाई सञ्चारकर्मीले ‘दिल्लीमा आरजुलाई प्रधानमन्त्री र शेरबहादुरजीलाई राष्ट्रपति बनाउने सहमति भएको हो’ भनी प्रश्न गरेका थिए।
सञ्चारकर्मीको प्रश्नको जवाफ दिँदै प्रचण्डले उक्त कुरा गलत भएको बताए। ‘यो सब हावा कुरा हो, एक प्रकारको भ्रम फैलाउने, कुनै न कुनै गिरोहले गरेको आपराधिक हल्ला हो’, प्रचण्डले भने, ‘त्यो हुनसक्ने कुरा पनि होइन।’
प्रधानमन्त्री शेरबहादुर देउवा पत्नी आरजु राणा पनि उपचारका क्रममा दिल्लीमा भएको र सोही बेलामा दूतावासमा भेट भएको स्पष्टीकरण प्रचण्डको छ।
‘मलाई दूतावासमा ब्रेकफास्टका लागि बोलाइएको थियो,’ प्रचण्डले भने, ‘त्यहाँ उहाँलाई पनि निम्ता रहेछ। दूतावासमा एकछिन ब्रेकफास्ट गर्ने बेलामा सँगै बसेका मात्र हौं। त्यसलाई धेरै हल्लाको रूपमा प्रचार गर्ने काम भयो।’
प्रचण्डले दिल्ली भ्रमणबारे अन्तर्राष्ट्रियस्तरसम्म हल्ला फैलाएको भन्दै आपत्ति जनाए। ‘अन्तर्राष्ट्रियस्तरमा समेत लगिएछ। मोदीले त्यो कारणले नभेटेको हुँदै होइन। यस्ता वाहियात, षडयन्त्रका प्रचारबाट सचेत हुन आग्रह गर्छु’, प्रचण्डले भने।
त्यस्तै, ‘प्रचण्ड’ले समाजवादी केन्द्र बनाउने तयारी अन्तिम चरणमा पुगेको बताएका छन्। ‘प्रचण्ड’ले गठबन्धनभित्र भएका वामपन्थी पृष्ठभूमिका समूहसँग एकताको प्रयास भइरहेको बताएका छन्।
प्रचण्डले केही दिनभित्रै समाजवादी केन्द्रको बारेमा एउटा निर्णयमा पुग्ने बताए। ‘सम्भवतः केही दिनभित्र हामी एउटा निर्णयमा पुग्छौं’, उनले भने। उनले जनता समाजवादी पार्टी फुटिसकेको, औपचारिक घोषणा हुन मात्र बाँकी भएको बताए।
‘गठबन्धनभित्रका वामपन्थी दलहरुसँग राम्रो समझादारी बनाउनपर्छ। सकियो भने चुनावी खालको विशेष मोर्चा पनि हुनसक्छ,’ प्रचण्डले भने, ‘पार्टी एकताका लागि संयोजन समिति पनि हुनसक्छ। छलफल भइरहेको छ।’
‘बाबुरामजीहरुको जनता समाजवादी पार्टी फुटिसकेको छ, त्यसको औपचारिकता दिन मात्र बाँकी छ। त्यो सँगै दुवै पक्षसँग हाम्रो छलफल चलिरहेको छ,’ प्रचण्डले भने, ‘उपेन्द्रजीसँग नेतृत्व गरिरहेको पार्टीसँग हामी गठबन्धनमा पनि सँगै छौं। बाबुरामजीले अर्को बनाउने पार्टी पनि गठबन्धनभन्दा बाहिर हामी हुँदैनौं भन्नुभएको छ। यसकारण उहाँहरु गठबन्धनबाट बाहिर जाने अवस्था छैन।’
माधव नेपाल, बाबुराम भट्टराई, वामदेव गौतम र आफूसहितका नेताहरु सो अभियानमा लागेको प्रचण्डले बताए। साथै, संसदबाट शुक्रबार पारित नागरिकता विधेयकको समाचार जनकपुर पुगेर सुनाउन पाएकोमा प्रचण्डले खुसी व्यक्त गरे।
‘हिजो मात्रै सदनबाट नागरिकताको समस्या समाधान भएको छ। जसको कारण झण्डै ६/७ लाख नेपालीहरु धेरै कामबाट वञ्चित हुनुपर्ने अवस्था थियो। त्यसको समाधान भएको छ,’ प्रचण्डले भने, ‘त्यो तुरुन्तै कार्यान्वयन हुन्छ। आज जनकपुरमा आएर पहिलोचोटी मैले पार्टीको तर्फबाट सुनाउन पाउँदा तपाईंहरुको माध्यमबाट मधेशका सम्पूर्ण जनतामाझ यो खुसीको समाचार सुनाउन पाउँदा गर्वको महसुस भएको छ।’
