विराटनगर ।
नेकपा माओवादी केन्द्रका नेता शिवकुमार मण्डलको आलोचना भएको छ । कार्यकर्तालाई खुट्टा ढोगाएको भन्दै उनको चर्को आलोचना भइरहेको हो ।
शनिबार बेलुका आफ्नो विवाहको वार्षिकोत्सव कार्यक्रममा मण्डलले कार्यकर्तालाई खुट्टा ढोगाएको भन्दै आलोचना भएको हो ।
वैवाहिक वर्षगाँठ मनाउन भन्दै शनिबार बेलुका देवा यादवसहितका माओवादीका कार्यकर्ताहरु विराटनगर महानगरपालिका वडा नं १ स्थित मण्डलको घर पुगेका थिए ।
केक काटेपछि कार्यकर्ताहरुलाई उनले टीका लगाइदिन्छन् । टीका थापेका कार्यकर्ता देवा यादवसहित अरूले पनि निहुरिएर मण्डलको खुट्टा छुन्छन् । मण्डलले उनीहरूलाई रोक्न पनि नखोजेको भिडिओमा देखिन्छ ।
सामाजिक सञ्जाल प्रयोगकर्ताले उक्त भिडिओ सेयर गर्दै कार्यकर्तालाई खुट्टा ढोगाएको भनेर मण्डलको आलोचना गरिरहेका छन् । मोरङको क्षेत्र नम्बर ५ बाट प्रतिनिधिसभा सदस्यमा निर्वाचित मण्डल पूर्वमन्त्री पनि हुन् ।
उनले यो आफूहरुको पारिवारिक संस्कार भएकाले आलोचनाको विषय नभएको बताए ।
आफूभन्दा जेठोलाई ढोग्ने आफूहरुको परम्परा रहेको भन्दै उनले कार्यकर्ताको रूपमा होइन आशिर्वादका लागि खुट्टा ढोगेजस्तो गरेका बताए ।
