काठमाडौं । नेपाली कांग्रेसका नेता डा. शेखर कोइरालाले पेट्रोलियम पदार्थमा लाग्दै आएको करमा छुट दिन आग्रह गरेका छन् । उनले सामाजिक संजालमा एक स्टाटस पोष्ट गर्दै पेट्रोलियम पदार्थमा लाग्दै आएको करमा प्रतिलिटर २६.६२ रुपैयाँ नलिने निर्णय गर्न सरकारलाई सुझाव दिएका छन् ।
अन्तर्राष्ट्रिय बजारमा मूल्य नघट्दासम्म प्रतिलिटर २६.६२ रुपैयाँ नलिने निर्णय गर्नु पर्ने उनको भनाइ छ । यसो गर्न सकिए जनताले महँगीको चपेटाबाट राहत पाउने र आर्थिक गतिविधि पनि गतिशील भइराख्ने डा। कोइरालाको भनाइ छ ।
उनले लेखेका छन्,‘जनतालाई महँगीको चपेटाबाट बचाउन र आर्थिक गतिविधि गतिशील बनाई राख्न सरकारले पेट्रोलियम पदार्थको मूल्यमा लाग्ने पूर्वाधार कर रु १०, सडक मर्मत कर रु ४ र भन्सार र प्रज्ञापन शुल्क रु २५.२३ को आधा रु १२.६२ गरी जम्मा रु २६.६२ प्रतिलिटर अन्तर्राष्ट्रिय बजारमा मूल्य नघट्दासम्म नलिने निर्णय गरोस् ।’
जनतालाई महंगीको चपेटावाट बचाउन र आर्थिक गतिविधि गतिशिल बनाई राख्न सरकारले पेट्रोलियम पदार्थको मुल्यमा लाग्ने पुर्वाधार कर रु१०, सडक मर्मत कर रु४ र भंसार र प्रज्ञापन शुल्क रु२५.२३ को आधा रु१२.६२ गरि जम्मा रु २६.६२ प्रति लिटर अन्तराष्ट्रिय बजारमा मुल्य नघटदा सम्म नलिने निर्णय गरोस।
— Dr Shekhar Koirala (@Shekharnc) June 24, 2022
नेपालमा पेट्रोलियम पदार्थको मूल्य आकासिएको छ । रुस र युक्रेनको युद्धका कारण पेट्रोलियम पदार्थको अभाव हुँदा मूल्य बढेको नेपाल आयाल निगमको भनाई छ ।
अहिले नेपालमा पेट्रोल १ सय ९९, डिजेल र मट्टीतेल १ सय ९३ रुपैयाँमा कारोबार भइरहेको छ । भारतले पठाएको पछिल्लो मूल्य सूची अनुसार पेट्रोल १ सय २८ रुपैयाँ परेको छ । निगमले त्यसमा विभिन्न शिर्षकका करहरु जोडेर २ सय १२ रुपैयाँ पर्ने निगमले जनाएको छ ।
उद्योग, वाणिज्य तथा आपूर्तिमन्त्री दिलेन्द्रप्रसालद बडूले पेट्रोलियम पदार्थमा मूल्य घट्ने संकेत गरेका छन् । पछिल्लो समय वृद्धि गरिएको मूल्य घटाउने संकेत गरेका हुन् ।
करका दरहरुमा समायोजन गरेर भएपनि पेट्रोलियम पदार्थको मूल्य समायोजन गर्नुपर्ने विषय संसदमा उठेको र सरकारको ध्यानाकर्षण भएको उल्लेख गर्दै मन्त्री बडूले सरकार सोही अनुसार अघि बढ्न सक्ने बताएका हुन् ।
बिहीबार संसद भवन परिसरमा सञ्चारकर्मीहरुसँग कुरा गर्दै उनले विद्युतको खपत बढाएर पनि यसको मूल्यलाई सहज बनाउन सकिने योजनामा सरकार रहेको बताए । मन्त्री बडूले भने, ‘पेट्रोलियम पदार्थको मूल्य समायोजन गर्ने विषयमा सरकारको ध्यानाकर्षण भएको छ । यसको समायोजनका लागि संसदमा जुन कुराहरु आएको छ । ट्याक्स समायोजन गरेर भएपनि घटाउनेतर्फ संसदमा जुन कुराहरु रहेको छ । त्यसको सन्दर्भमा सरकारको ध्यानाकर्षण भएको छ । अर्को विकल्प भनेको विद्युतको खपत बढाउने हो । त्यो कामलाई सरकारले प्राथमिकता दिएको छ ।’
मन्त्री बडूले विद्युत खपत बढाएर पेट्रोलियम पदार्थको निर्भरता घटाउने कामलाई सरकारले प्राथमिकताका साथ अघि बढाएको दावीसमेत गरे । उनको दावि अनुसार पछिल्लो समय बढेको मूल्य घट्ने । निगमले पछिल्लो समय पेट्रोलमा २१ रुपैयाँ, डिजेल र मट्टीतेलमा २७ रुपैयाँ बढाएको थियो ।
तर नेपाल आयल निगमका प्रवक्ता विनितमाणि उपाध्यायले सरकारले पेट्रोलियम पदार्थको १० रुपैयाँ कर घटाए पनि मूल्य घटाउन नसक्ने अवस्थामा रहेको बताएका छन् । उनले भने, ‘सरकारको नीति तथा कार्यक्रममा नै परल मूल्य अनुसार नै पेट्रोलियम पदार्थ बिक्री गर्ने भन्ने उल्लेख रहेको छ । त्यसैले पनि मूल्य घट्दैन होला ।’
