Latest News

भरतपुरमा आयोजित गठबन्धनको चुनावी सभामा शेखर र गगन नजाने, यस्तो छ कारण

Nepalese Times May 5, 2022 (7 Month ago)    636 Views

नेपाली कांग्रेसका नेता डा. शेखर कोइराला र महामन्त्री गगनकुमार थापा चितवनको भरतपुरमा आयोजित सत्ता गठबन्धनको चुनावी सभालाई सम्बोधन गर्न नजाने भएका छन्।

भरतपुरको चुनावी कार्यक्रममा आउन प्रधानमन्त्री तथा नेपाली कांग्रेसका सभापति शेरबहादुर देउवाले नेता डा. शेखर कोइरालालाई फोन गरेर आग्रह गरेका थिए । तर कोइरालाले ढिलो खबर आएको र आफू पूर्वनिर्धारित कार्यक्रममा विराटनगरमा व्यस्त भएको भन्दै भरतपुर नजाने जवाफ दिएका छन् ।

बिहीबार बिहान सभापति देउवाले नेता कोइरालालाई फोन गरी भरतपुर आउन आग्रह गरेका थिए । सभापति देउवासँग फोनमा भएको संवादबारे कोइरालाका स्वकीय सचिव दिनेश थपलियाले भने, ‘सभापतिले फोन गरेर भरतपुरको कार्यक्रममा आइदिनपर्यो भन्नु भयो । कार्यव्यस्तता भएकाले आउन नसक्ने जानकारी दियौं ।’

सभापति शेरबहादुर देउवा भने बुधबार विराटनगरमा आयोजित गठबन्धनको चुनावी सभालाई सम्बोधन गरेर बुधबारै नेपाली सेनाको जहाजमार्फत चितवन पुगिसकेका छन्।

शेखरको कार्यक्रम प्रदेश १ का विभिन्न जिल्लामा तय भइसकेको छ। उनका स्वकीय सचिव दिनेशचन्द्र थपलियाका अनुसार प्रदेश १ मै दिनभर कांग्रेसका कार्यक्रममा कोइराला सहभागी हुँदै छन्। महामन्त्री थापाको सचिवालयले पनि चितवनको कार्यक्रममा सहभागी नहुने जनाएको छ।

महामन्त्री थापाको सचिवालयका एकजना सदस्यका अनुसार उनी बिहीबार नेपाली कांग्रेस काठमाडौं महानगर कार्य समितिको आयोजनामा अनुपम फुडल्यान्डमा हुने कार्यक्रममा सहभागी हुँदैछन्।

उता भरतपुरमा हुने गठबन्धनको सभामा कोइराला र थापा पनि आउने जानकारीसहित बुधबारदेखि नै प्रचार भइरहेको छ।

यस्तै नेपाली कांग्रेसका वरिष्ठ नेता रामचन्द्र पौडेलले भरतपुर महानगरपालिकाको मेयरमा स्वतन्त्र उम्मेदवारी दिएका जगन्नाथ पौडेललाई भेटेका छन् ।

भरतपुरमा आज सत्तागठबन्धनले गर्न लागेको चुनावी सभाअघि रामचन्द्र र जगन्नाथबीच भेटवार्ता भएको हो । रामचन्द्रनिकट स्रोतका अनुसार आज बिहान होटल सिरागचुलीमा जगन्नाथ, मीना खरेल र कृष्णलाल सापकोटासँग कुराकानी भएको हो ।

जगन्नाथ मेयर उम्मेदवार बन्दा खरेल समर्थक र सापकोटा प्रस्तावक बसेका थिए। उनीहरू पनि कांग्रेस कार्यकर्ता थिए। आजको भेटमा जगन्नाथलाई रामचन्द्रले उम्मेदवारी निस्कृय बनाउन आग्रह गरेका थिए।

तर जगन्नाथले आफूहरू गठबन्धनको पक्षमा नरहेको र कांग्रेस बचाउन आफ्नो उम्मेदवारी कायमै राख्ने अडान दोहोर्‍याएको स्रोतको दाबी छ।जगन्नाथ कांग्रेसले भरतपुर महानगरमा मेयर पाउनुपर्छ भन्ने पक्षमा थिए।

तर यहाँ सत्तागठबन्धनले मेयरमा माओवादी केन्द्रकी रेनु दाहाललाई समर्थन गरेपछि उनले मेयरमा स्वतन्त्र उम्मेदवारी दिएका थिए। कांग्रेसले आधिकारिक उम्मेदवारविरूद्ध बागी उम्मेदवारी दिनेलाई पार्टीबाट हटाउने निर्णय गरिसकेको छ।

प्रतिक्रिया दिनुहोस