काठमाडौं । आगामी वैशाख ३० गते हुने स्थानीय तहको निर्वाचनका लागि प्रमुख दलहरू उम्मेदवार तय गर्न आन्तरिक रूपमा गृहकार्य गरिरहेका छन् ।
सबै दलले स्थानीय तहको वस्तुस्थितिको मूल्यांकनसहित सम्भावित प्रमुख, उपप्रमुख, वडाध्यक्षको उम्मेदवारको नाम पार्टीलाई सिफारिस गरिसकेका छन् ।
ललितपुरको गोदावरी नगरपालिकामा मेयर को बन्ला भन्ने चर्चा सुरु भएको छ । गत स्थानीय तहको निर्वाचनमा गोदावरीमा मेयर र उपमेयरका साथै बहुमत वडाध्यक्ष नेपाली कांग्रेसले जितेको थियो ।
मेयरमा गजेन्द्र महर्जन र उपमेयरमा मुना अधिकारी निर्वाचित भएका थिए । महर्जन यसपटक पनि उम्मेदवारी दिने गरी चुनावी तयारीमा जुटेका छन् ।
कांग्रेसबाट विमलचन्द्र विष्ट र पुरुषोत्तम सिलवालको पनि मेयरमा उठ्ने चर्चा छ। पाँच वर्षमा योजना र ऐन–नियम तर्जुमाका धेरै काम भएकाले अर्को कार्यकालमा नगरपालिकाका भौतिक पूर्वाधार र पर्यटन विकासका लागि आफूले फेरि उम्मेदवारी दिने तयारी गरेको मेयर महर्जनले बताए।
गोदावरी नगरपालिकाको मेयरमा अभिनेत्री करिश्मा मानन्धरको पनि चर्चा छ। उनी हालै एमाले प्रवेश गरेकी हुन्।
ललितपुरको प्रतिनिधिसभा १ मा संघीय सांसदमा समेत करिश्माको नाम चर्चामा आउन थालेको छ । तर, एमाले उच्च स्रोतका अनुसार करिश्मालाई मेयरमा उठाउन सके एमालेले चुनाव जित्ने आकलन गरिएको छ ।
गोदावरी टौखेलस्थित करिश्माको घरमा जिल्लाका नेताहरूले केही दिनदेखि उम्मेदवार कसलाई बनाउने भन्नेबारे छलफल गर्दै आइरहेका छन्।
पार्टीले उम्मेदवार बनाएको खण्डमा चुनाव लड्न आफू तयार रहेको मानन्धरले बताइन् । गोदावरीमा एमालेका तर्फबाट गम्भीरबहादुर राना, रघुनाथ महर्जन, प्रदेश सांसद चेतनाथ सञ्जेल र मधुसूदन पौडेलको चर्चा छ।
पार्टीभित्रको छलफलपछि उम्मेदवारको टुंगो लाग्ने सांसद सञ्जेलले बताए। उनले पार्टीको सल्लाहअनुसार आफूलाई उम्मेदवार बनाए चुनाव लड्न तयार रहेको पनि बताए।
गोदावरीमा माओवादी केन्द्रबाट कलाकार राज घिमिरे र न्हुच्छेंबहादुर महर्जनको चर्चा छ। ‘चपली हाइट’ चलचित्रका अभिनेता घिमिरे फिल्म पेसा छाडेर व्यवसाय तथा सामाजिक कार्यमा संलग्न रहँदै आएका छन्।
यसपटकको चुनावमा उम्मेदवार बन्ने तयारीसहित प्रचारप्रसारमा लागेको कलाकार घिमिरेले बताए।
