ताजा समाचार

काठमाडौंमा मासुको मूल्य तोकियो, कुन मासुको मूल्य कति ? (सूचीसहित)

नेप्लिज संवाददाता २१ आश्विन २०७८, बिहीबार २०:०७ (1 हप्ता अघि)    ५४५ जनाले पढ़िसके

काठमाडौं । काठमडौं उपत्यकामा मासुको मूल्य तोकिएको छ । एक वर्षका लागि तयारी मासुको बिक्री मूल्य निर्धारण गरिएको राष्ट्रिय मासु व्यवसायी संघले जनाएको छ ।

सरकार र व्यवसायीहरुबीचको आपसी सहमतिमा एक वर्षका लागि विभिन्न प्रकारका मासुको अधिकतम् खुद्रा बिक्री मूल्य निर्धारण गरिएको हो ।

वाणिज्य विभागसँगको समझदारीमा खसी, कुखुरा, राँगा र बंगुरको मासुको मूल्य गत वर्षकैलाई याथवत राख्ने सहमति भएको संघले जनाएको छ ।

यो मूल्य अबको एक वर्षका लागि मान्य हुने भएको छ । तोकिएको नयाँ मूल्य अनुसार खसीको मासुको मूल्यलाई तीन भागमा छुट्याएर मूल्य तोकिएको छ ।

काठमाडौं उपत्यकामा सामान्य अवस्थाकै हाराहारीमा मासुको बिक्री हुने अनुमान व्यवसायीहरुको छ । उपत्यकामा दैनिक १२ सय वटा खसी काटिने गरेको अनुमान व्यवसायीको छ ।

त्यसबाहेक धेरै खसीबोका अष्टमीका दिन उपभोक्ताको घरमै काटिने भएकाले तयारी मासुको बिक्री कम हुने अध्यक्ष खड्गी बताउँछन् । यस्तै दैनिक तीनदेखि तीन लाख ५० हजार किलो कुखुराको मासु खपत दशैंमा पनि नियमित हुने संघको अनुमान छ ।

यस्तै आठ सयको संख्यामा राँगा र भैंसी, छ सय गोटा बंगुर र पाँच हजार किलो माछाको दैनिक खपत पनि यथावत नै रहने भनिएको छ ।

संघका आन्द्रा र भुँडी मिसिएको खसीको प्रतिकिलो मूल्य एक हजार रुपैयाँ तोकिएको छ । आन्द्रा, भुँडी र बोसो नमिसिएको तर बिक्रेताले छानेर दिने मासुको प्रतिकिलो मू्ल्य १२ सय रुपैयाँ तोकिएको छ ।

उपभोक्ताले छानेर खरिद गर्ने खसीको मासुको मूल्य किलोमा १३ सय रुपैयाँ तोकिएको छ । यस्तै ब्रोइलर कुखुराको मासुको मूल्य तीन सय रुपैयाँ किलो कायम गरिएको छ ।

कुखुराको तयारी मासुको मूल्यमा किलोमा ५ देखि १० रुपैयाँ भने तलमाथि हुनसक्ने संघले जनाएको छ । यस्तै उपभोक्ताले छानेर खरिद गर्न सक्ने राँगा र बंगुरको मासुको प्रतिकिलो मूल्य पनि ५ सय रुपैयाँ किलो कायम गरिएको छ ।

यस्तै बजारमा अत्यधिक मात्रामा रुचाईने रहु माछाको मूल्य किलोमा ३५० देखि ४ सय हाराहारी पर्ने भएको छ ।


प्रतिक्रिया दिनुहोस