ताजा समाचार


माधव नेपाल समूहले ओलीलाई भने – सबैभन्दा पहिले नाराबाजी रोक्नुस्

नेप्लिज संवाददाता ६ श्रावण २०७८, बुधबार १८:१४ (1 हप्ता अघि)    ६६ जनाले पढ़िसके

काठमाडौं । नेकपा एमालेको माधवकुमार नेपाल समूहले पार्टी एकता गर्ने हो भने सबैभन्दा पहिले नाराबाजी रोक्नुपर्ने बताएका छन् । माधवकुमार नेपालसहितका नेताहरुविरुद्ध भइरहेको नाराबाजी रोकेर एकताका लागि गम्भीरताका साथ प्रयास गर्न यो समूहले अध्यक्ष ओलीलाई आग्रह गरको हो ।

२२ सांसदले फ्लोर क्रस गर्दै प्रधानमन्त्री शेरबहादुर देउवालाई मत दिएपछि नेता नेपाल समूहका स्थायी कमिटी सदस्यहरुको पहिलो बैठकले यस्तो आग्रह गरेको हो । बैठकमा उपाध्यक्ष भीम रावल भने सहभागी नभएका नेताहरुले बताएका छन् ।

बैठकपछि जारी गरिएको प्रस्तावमा भनिएको छ-

‘एकता वार्ता चलिरहेको र १० बुँदे सहमति बुझाएको अवस्थमा स्पष्टीकरण सोध्ने र वरिष्ठ नेता माधवकुमार नेपालविरुद्ध नारा जुलुस गर्ने एवं पुत्ला जलाउनुका साथै संविधान र सर्वोच्च अदालतको फैसला अनुरुप आफ्नो विवेक प्रयोग गरेर विश्वासको मत दिने सांसदहरुलाई आतंकित पार्ने र उनीहरुविरुद्ध उत्तेजक गतिविधि र नाराबाजी गर्ने काम तत्काल रोकिनुपर्छ । यस्ता गलत र उत्तेजक कार्यविरुद्ध खेद व्यक्त गर्दै यस्ता गतिविधिलाई तत्काल रोकेर पार्टी एकताको कामलाई गम्भीरताका साथ अगाडि बढाउन यो बैठक पार्टी अध्यक्ष कमरेडको ध्यानाकर्षण गराउँछ ।’

एकता वार्ता चलिरहेको बेला स्पष्टीकरण सोध्नु एकता प्रक्रियामा भाँजो हाल्ने काम भएको नेता रघुजी पन्तले बताए । यस्तै उनले अदालतको फैसलाले प्रष्ट रुपमा धारा ७६ (५) मा सांसदलाई विवेक प्रयोग गर्ने अधिकार दिइसकेपछि त्यसलाई आधार बनाएर अरु निहुँ झिकेर स्पष्टीकरण सोध्नु राम्रो नभएको बताए ।


प्रतिक्रिया दिनुहोस